Əleng
| Taksoni nom | Ciconia  |
|---|---|
| Taksonə səvijə | genus |
| Taksoni nezə penə səvijə | Ciconiini |
Əleng — gylə pərəndəje[1].
Lyngonyš, gyjyš, kəšonyš dyrozə pərəndəj. Pərejədə gyj bə nav dyroz kardejdə, lyngon isə bə dumo. By formədə 1 metrəsə dyroz bejdə.
2 čuryš heste: sipijə əleng, sijo əleng. Cəməku ən vej sipijə əleng bejdə. Dyždə pərəndəj. Poron rangyš vejni sipi, kəšonyš sijoj. Cəšon kənoədəki gučilijə vyron isə sijon. Kəšon dyrozi 110–116, pənčə luləš 20 – 26 sm, tyki dyrozi 15–19 sm bejdə. Əlengi gədə gylə 3 kg, jolə gylə 4 kg 400 ǧ omejdə. Bylyndə doon bešədə lone gətejdə. Culə – cəvul, aləf vardejdə, boštəno lonə dutejdə. 3 – 5 gylə moǧnə nojdə. Həm nijə gylə, həm moə gylə moǧnəsə nyštejdə. Morə, mor, morəcəcul, kulmə, mely-məvuš hardejdə.
1972- nə sori Šaǧoləserədə giti əleng pəjdo be. Cy gyləj kəj peštono, bylyndə tujə doədəšon lone gəte (cy kəsojbon 7 sor be əǧylyšon bejdə nybe). Zymystonyšon əjo dəvonije (bə məktəbi nez be goryš, har ruž vindejdəbimon). Əvəsor orəxəj, tovystonədə čəmati vindyše ki, əlengon 4 gylə baləšon bekardə. Cy koj osori cə kəsojbi iminə əǧyl bə dynjo oməj. Ysət cəvon 4 gylə zoəšon heste. Səǧ-səlomətin, žijejdən. De əlengon angyl yn xosə xatirə hələ gəvonədəj.
De əlengi angyl Tolyšə folklorədə žyǧo gyləj šeer heste:
«Əleng, əleng, podišo,
Təjlə tifang cəj dušo,
Əlengi lyng mujnine,
Dast məžənən, xunine.
Ovi hardə kecədə,
Moǧnə nojdə recədə.»
“Əlengi lyng xunine” ifadə, həlbət, de cəj lyngi syə rangədə bej angyle.