Hembel
| Taksoni nom | Phalacrocorax  |
|---|---|
| Taksonə səvijə | genus |
| Taksoni nezə penə səvijə | Phalacrocoracidae |
| Homonymous taxon | Phalacrocorax goletensis |
Hembel — pərəndə gyləj čure, Tolyšistonədən ve heste. Andomi penə tərəfi poron bə havzə rang mandə tyndə xaki, žinə poron bə kavu mandə etəsə rangisəj. Tykyšən etəsə ramgisəj. Tyki bə byni tərəf ižən dumi kəcələ vyron zardin[1]. Lyngonyš sijon.
Hembeli 2 čuryš heste:
- Dyždə hembel;
- Gədə hembel.
Dyždə hembel tovystonədə 1,7–2,6 kg, zymystonədə 1,8–3,0 kg omejdə. Bənə myvi, hembelən navko vej əbi. myrdovi bə hyšk žəj bəpeštə əvən kamko bə. Ǧyzyləǧazədə ižən heste. Pozi syftəku tobə əvəsori syftə bəcəmə xandəxon, kanalon omejdə. Dyždə hembel yštə lonə cy lejnon, dəlon, pizon arədə gətejdə. bə čo pərəndon lonən sojb beše zynejdən.
Hembel 6–7 gylə balə bekardejdə. Dyždə hembel əsosən moj-kulmə hardejdə. De cəke, kulmə, čuf, kilkə duste. ovədə bə mely-məvušijən hardejdə. moj-kulmə perosnijə vyronədə cy moj-kulmə kyry, ja gədə balon hardejdə, zijon žəjdə.
Hembelon lyngədən bənə myvi, cyngyri pənčəš heste. Də pərəndon gyləjən fərǧyš yme ki, hembelon cy doon xyconsə nyštejdən. Nošijə tifangəvonon hembeli de bəti umuž eǧandejdən. Hembel bəštə balon ovədə hardemon dojdə. Moə moj-kulmə šyrtulə kardejdə, šodojdə bə ov, balon əj pəjdo kardejdən hardejdən. Kəšon dyrozi 60 sm bejdə.
Gədə hembel: Dijəroədə dijə kardejədə sijo cijejdə. Əvəsorədə səš, gyjyš xaki bejdə. Andomi har vyrədəš pešandəčo gədə sipijə cilon hestin. Sinə, luzyš rušinə boz, xyrtəš sipi bejdə. gədə hembel 500–900 ǧyrəmi arədə gužd dojdə. Gədə hembel veje. Ən vej Ǧyzyləǧazədə lonə gətejdə. Yštə lonə lejnəžoron, ovi egətə hyrd-xəšəlinə vyronədə gətejdə. Gədə hembeli kəšon dyrozi 41–43 sm bejdə. odəmi vindejədə bə ov ešejdən, ovi žitono xəjli čum hardejdən, cəjo bešejdən, pərejdən.
Har dy hembeli dumon ǧədəri dyrozin. Dumi poron gylə-gylə cijejdən. Žogo byzyn ijəndyku čon. Hembelon tyk tykəj dyroz, tyki penə hissə oxoj šate. De šatə hissə koməgi yštə hardemoni - moj, kulmə, vəzəxi rohat gətejdə. Jəni cy tyki šatə hissə bəštə “neci” pešti egətejdə, əj cy ovo bekardejdə.
Tolyšistonədə de hembeli angyl žoǧo gyləj ifodə heste: - «Kəxobi zoə (kinə) sijo hembele ki?» yn syxani bə sijoləvunə odəmi votejdən.