Rəssaməti

Rəssaməti — təsviri inčəsənəti ən ǧədimə nuvonədə gyləj. Bə hyšk ijən namə kətoni rangon kəce, de rəǧəmə texnologija ijən de xususi texnologijon bə real predmeti, jainki bə čoninon oxšər vizual təsviri nyvyšte.

Rəssamətiədə real aləmi həčm, rang, məkan, predmeton maddi forma, išyǧ həvo muhit ijən i čo. De caši vində objektiv movčud byə əlaməton kəšə bedən. Rəssamə sənəti əsas əlaməton obrazəti ijən emosionalətije. Kəšə əsəron obrazəti ideja ijən movzu, bə sužeti ijən bə xarakteron vəhdəti pemandedə. Ce bədii obrazi yn komponenton bənə rəsmi, kompozisija, koloriti, išyǧ-soǧnə, perspektivi, ritmi təsviri ijən de ifodə vasiton bə sə omedən.

Rəssamə sənət de bədii-estetik funksijon vexoləjəti angyl bə čur-bə-čurə nuvon čo bedə:

Monumentalə rəssaməni;

dekorativə rəssaməti;

teatr-dekorativ rəssaməti;

miniatürə rəssaməti;

dəzgahə rəssaməti.

Har nuvi məxsusi texniki ifodə usulon ijən materialoniš heste.

Ce Rəssaməti ən ve oko byə forma dəzgahə rəssamətije. Kəton ijən cu səpe de ruənə rangi kəšəjnə žoǧo əsəron "molbert"ə nominə dəzgahonədə soxtə bedən. Syvoj ruənə rangon, rəssamətiədə tempera, pastel, akvarel, guašə texnikonən tətbig bedən. Ce monumentalə rəssamə əsəronku fərgin, dəzgahə rəssaməti əsəron sərbəstin, əvoni har vyrədə ehašde bedə. Bə yštə məzmuni goroš rəssamə sənət by žanron čo bedə:

Tarixi rəssaməti;

mifoloži rəssaməti;

məišəti rəssaməni;

portreti rəssaməti;

mənzərə rəssaməti;

naturmorti rəssaməti i.i.č.