Mustafajev Xanlar Nuri zoə

Xanlar Nuri zoə Mustafajev — tolyšə šair (ədəbi təxəllusiž Xan Pirani) aprelə mangi 13-də bə rəhmət šə. Əv 1965-minnə sori dekabrə mangi 9-ədə, Liki Veri-Aliəbod dijədə bə dynjo oməbe. Ukrajnədə Simferepol Ali Hərbi-Sijasi məktəbyž oroxnijəšbe. 1992-minnə sorədə Azərbojčonədə Millijə Ordu soxtə bejədə bə Vətən oməbe. “N” numrəjnə hərbi hissə komandir be. 1997-minə sorədə bə səhhətyž nosozətiro major rutbədə istefaš doəbe. Ižən bə Ukrajnə Simferepol šəhəryž kuc kardəžbe. 2 evladi pyəbe. Xanlar tolyši xalǧi mədəni, sijosi rosbemoni problemon həl karde roədə hežo fəolijət nišon dojdəbe. Xysusən interneti sajtonədə əcəj ičtimoi-sijosi, ədəbi-bədii nyvyštəjon həmmə kəsi dyǧǧəti čəlb kardedəbe. Facebookədə "TALIŞ_TALVİЯ-TALYSH_TALVİYA" grupi admin be. De “Xan PİRANİ” imzo tolyšə šeiron ənyvyštij. Ve cokə, loziminə konyš byə. Həzo orzujonyž dylədə mande.