Mikajyl Hačyjev
Mikajyl Hačyjev (04 mart, 1960 sor, Lankoni rəjon, Xolmili di) — hərbi xydmətədə polkovnik rytbədə sərvoz, Tolyš-Myǧonə Muxtarə Respublikədə soxtəkəsonədəj, ce 704-minə brigadə sərdor byə.
Biografijə
[sərost bykə | kodi sərost karde]Hačyjev Mikajyl Hačyverdi zoə Lankoni rəjoni Xolmili dijədə 4 mart 1960-minə sorədə bə dynjo omə. Hežə həminə Xolmili dijədə mijonə məktəbi oryxniše, ijən 1979 sorədə de yštə həvəsi bə Sovet Ləšǧəri še[1].
Pešo hežo 1979 sorədə Lvov oblastədə Zolocevədə «žinə komandiron» məktəbi oryxniše de əla ǧyjməti ijən nimsor bəpeštə «seržant» rytbə səše.
1980 sorədə əv bə Kirovi nomədə Ali hərbi komandiron məktəb dəše Orčonikidze (ysət Vladikavkaz) šəhərədə. 1984 sorədə Ali hərbijə məktəbi oryxniše. Ve cok hande ijən nymunəjnə əxloǧi nišon karde co sor bəpeštə əv ce kimjə kəšfijoti hərbijə idorə karde mašini komandir təjin be. 1984 sorədə «moto-ǧandəvonə ləšǧəri əfsər ijən lejtenant» rytbə səše. Pešo Sovet Šurədə čurbəčurə vyronədə hərbi xydmətyš dəvonijə[1].
1987 sorədə bə Leningradi Ali hərbijə-sijosijə məktəb dəše ijən əvyš oryxni. Sovet ləšǧəri dylədə vejni Ural hərbijə vilojətədə gədə-gədə xydmət kardejdəbe ijən rəsəj bə žygo vəzifon - divizijə komandir, sərrəsəd, sijosijə hissə divizijə komandiri myovin, divizijə komandir, bataljoni štabi rəis, bataljoni komandir, polki komandir, ce čojlinə moto-ǧandəvonə brigadə komandiri myovin, ijən ce čojlinə moto-ǧandəvonə brigadə komandir. Ce 1992 sori janvari 2-ku Azərbojčoni Respublikədə Russijə ləšǧərədə xydmət karde bino kardyše, ijən ce 1992 sori 25 ijuliku – ce Azərbojčoni Respublikə Millijə ləšǧərədə.
Iminə ružonku bə čəbhə šeš pidəbe. 11 fevral 1992 soriku əv iminə kərə bə čəbhə rijə ce Russijə Dylətonə ləšǧəri bataljoni bekardyše ijən ce Aǧdam rəjoni Šelli di mydofijədə ištirok kardyše. 1992 sori martə mangədə ce Poprəvənd ijən Ǧələjcilar dijon ozod kardejədə ištirok kardyše. 1992 sori oktjəbri 2-ku «Lacin koridori» hərbijə əmalijoti ovand bə vyrə rosnije gornə bəj «Azərbojčoni Milli ǧəhromon» šərəfmandə rytbə došone. Mikajyl Hačyjev hərbi xydmətədə bə «polkovnik» rytbə rəsəj[1].
24 dekabri 1992 sorədə de Mydofijə naziri hykmi əvyšon ce Bejlagan čəbhə rijə komandir təjin kardyšone, ijən ce apreli 2-ku 1992 sori de Azərbojčoni Respublikə prezidenti fərmoni əvyšon ce Aǧčəbadi rəjoni mystəsno hərbijə komendant təjin kardyšone.
Peš «Lacin koridori» əməlijoti orəxe, 820 polk bə Lankon ogyrdynijə be bə daimi dislokasijə. 25 oktjəbri 1992 sorədə 820 polki bynovrədə704-minə brigadə soxtə bejdə. 1992 sori nojəbrə mangi oxojədə ce 704-minə brigadə sərdor Mikajyl Həčyjev təjin bedə. 704-minə brigadə hisson Xočəvəndi ijən Aǧčəbədi rəjonon mydofijə kardejədə mande.
1993 sori aprelə mangi syftədə ermənijon bə Fizuli hučumədə, 704 brigadə hisson bə Xočəvəndi rəjoni ǧəsto zərbə žəšone, bo bəštə səpe ǧyvvon okyrnij gornə ijən Fizulijədə holi tikəj hoston karde. Hežo həminə vaxtədə ce 704 brigadə i gylə bataljon de Mikajyl Hačyjevi sərdorəti ištirok kardyše hučum karde bə Fizuli, by əməlijotədə əvon zynəšone ermənijon ce Fizuliku dijəro karde. 1993 sori tovystonədə 704-minə brigadə hisson Aǧčəbadi rəjonədə čangonədə ištirok kardyšone ijən zynəšone kali dij ozod karde. Aǧdami gəte bəpeštə 704 brigadə ce Aǧdami ijən Aǧčəbadi rəjonon mijono mydofijə karde bino kardyše[1].
Tolyš-Myǧonə Muxtarə Respublikə
[sərost bykə | kodi sərost karde]21 ijun 1993 sorədə 704-minə brigadə jolon bə ǧəror bešin ki «Bə xəlǧi ovarde», končo votedəbin ki respublikədə ysətnə typəjnə bədə holədə behukmətəti nətičədə ijən iǧtisodijə xərobətijədə, brigadə bə yštə gi gətejdə ce Azərbajčani haft gylə rəjoni xəlǧi bexətoəti təmin karde — (Ostoro, Lankon, Lerik, Vərgədiz, Masalu, Čəliləbad, Biləsyvo) ijən Tolyš-Myǧonə Muxtarə Respublikə (TMMR) soxte elon kardejdə. Ə.Hummətov esə sənədyš buminə TV-ədə handyše[2].
7 avgustədə ce TMMT Milli Məčlisi jyǧnəǧ obəj, əv ǧəbul kardyše Tolyš-Myǧonə Muxtarə Respublikə soxte[3]. Milli Məčlisi jyǧnəǧədə ce muxtarijəti prezident Ələkrəm Hummətov vyžnijə be, ce Milli Məčlisi nujə sədr vyžnijə be (Fəxrəddin Əbbasov) ijən ce Naziron Kabineti sədri (Rakif Hočəjev), ijən hažygo konstitusijə ǧanun ǧəbul kardə byəbe, təsis kardə byəbin: himn, parcəm ijən čo ce muxtarə respublikə atributon.
23 avgustədə Əlijev TV-ədə bešedə ijən ǧəsto bo tolyšə əholi votejdə ki bydə əvon TMMR əlejh bešun. Həminə ružədə ce šəhəri ičroijə komitə bina vədə končo ce muxtarijəti hakimijət mandə be odəmon dastə gyrdə be, bə dastədə tyrkə millətpərəston partijəku odəmon bin, hežo ce Azərbojčoni Xəlǧə Čəbhəku ijən «Musavət»[2]. Ym dastə bə ičroijə komitə dəšin, əmma əv təjli be. Hummətov ce 704-minə brigadə štabədə be. Həminə ǧəsto vyǧandə byə dastə hic tolyšən nybin, vejni ce čo zəminonku vyǧandə byə odəmon bin, pešo əvon bə brigadə mandə sərvozə hissəšon hučum karde, əmma ce 704-nə brigadəku sərvozon gullə nyžəšone, əmma rəsmijə versijədə 3 kəs marde, oxojədə məhkəmədə ym kyštə odəmon bə sərvozon gi noj nyzynəšone.
24 avgustədə Boku bə Tolyš ləškəg vyǧandyše ijən TMMRi ləǧv kardyše, kali idəmonyšon kyšte, əmandəjon bə zindon šodoj.
Səvonon
[sərost bykə | kodi sərost karde]- ↑ 1.0 1.1 1.2 1.3 Mikayıl Hacıyev. QARABAĞ HƏQİQƏTLƏRİ NADANLIQLAR, YOXSA, ... S. 5-6. — s. 111. — 2017
- ↑ 2.0 2.1 Mixail Žiroxov. Mec i ogon Karabaxa. Xronika neznamenitoj vojny. 1988—1994. — Moskva: Tsentpoligraf, 2012. — S. 24. — 304 s. — ISBN 978-5-227-03227-0.
- ↑ Šnirelman V. A. Vojny pamjəti: mify, identicnost i politika v Zakavkazje / Resenzent: L. B. Alaev. — M.: Akademkniga, 2003. — S. 118. — 592 s. — 2000 ekz. — ISBN 5-94628-118-6.