Zaur Rzajev
Zaur (Zadir) Rzajev (10 oktjabr 1937 sor, Šuruk di, Lankoni rəjon — 29 janvar 2010 sor[1]) — cy Azərbojčoni sərvoz general byə. Millətyš tolyše.
Biografijə
[sərost bykə | kodi sərost karde]Lankoni rəjoni, Šuruk dijədə bə dynjo omə. 1955-nə sorədə Šurukədə mijonə məktəbyš oryxni, hežo həminə sorədə bə Boku Pedəgoži instituti fizikə-rijoziotə fakultə dəše. Əmma, 1958-inə sorədə yštə hande byrniše ijən əv bə Boku Ali Umumihərbi komandiron məktəb dəše ijən pešo 1962-inə sorədə hərbi məktəbyš oroxnijəše. 19 oktyabr 1992-inə sorədə general-major be[1].
Cy 1962 soriku hərbi xydmətədə be GDR-ədə (Almanijə Demokratikə Respublikədə). 1971 sorədə Məskovədə bə M.F. Frunze nomədə hərbi akademijə dəše.
Akademijə oryxnije bəpeštə bənə polki komandiri myovini bə Boku Kišvəri Universiteti hərbi kafedrə vyǧandə be. Ijo əv tosə polkovniki rytbə rəsəj ijən kafedrə jol təjin kardə be.
1991 sori oktjabrə mangədə əvyšon cy Azərbojčoni iminə hərbi hissə komandir təjin kardyšone, ym hissə cy Sovet Ləšǧəri № 18 110 numrə hərbi hissəku bynovrə pegətyše. Zadir Rzajev cy Hərbi hissə komandiri vəzifə gətəšbš ijən cy mydofijə vəziri myovin be.
19 oktjabri 1992 sori bəj general-majori rytbə došone.
1993 sori avgusti oxojədə gyləj xydmətə əməlijoti bə vyrə rosnijejədə cy Bejlagani nezijədə, əv zynə nybə hodisonədə bə avtokatastrofə egynijedə. Nətičədə əv kəllə-maxgi travma səše ijən se mangisə ve məčbur be gospitalədə myoličə karde. General žygo travmə bəpeštə bə yštə ome nyzynəše ijən 2 nojabrədə kojku nekardə byəbe[1].
General dəfn kardə byə Boku Ǧurbinə dəkande 2-nə Allejəjədə.